KALIBO, Aklan—Ginpaidaeom sa daywang dominggong surgical lockdown ro sambilog pang purok sa isla it Boracay umpisa makaron nga adlaw it Sabado, Mayo 1, 2021 bangud sa pagtaas it mga kaso it COVID-19.
Base sa Executive Order No. 20, series of 2021 ni Malay Mayor Frolibar Bautista, ginpatuman ro surgical lockdown sa purok 5 it Barangay Manocmanoc nga magabuhay it hasta Mayo 14, 2021 matapos makalista it 16 nga dugang nga kaso, kun siin waeo kara ro naghalin sa nasambit nga lugar.
Suno kay Manocmanoc punong barangay Nixon Sualog, uman nga nagtaas ro COVID-19 cases bangud sa sangka residenteng may sakit nga pneumonia nga gindaea sa pampublikong ospital sa isla ag natukiban nga positibo raya sa deadly virus.
Insigida suno kana nga nagpatigayun it mas agresibong contact tracing sa mga nakasalamuha it pasyente ag 13 kara ro natapnan.
Mahugot nga ginabanyan makaron ro lugar bangud mag-eowas nga dikit-dikit ro baeay, kaabuan nga naga-istar kara hay mga naga-rentang tourism workers.
Dugang pa ni Sualog nga posibleng mapatag-uran ro lockdown, depende sa magiging resulta it swab test it mga close contact it mga nagpositibo sa virus.
Madumduman nga ko Abril 29 eamang kat bawion ro surgical lockdown sa zone 1 ag 7 sa Barangay Manocmanoc bangud man sa pag-abo it mga kaso it COVID-19.
Presenteng may 82 active cases ro Malay para sa kabilugang 282 nga kumpirmadong kaso ag nagapabilin nga daywa ro namatay base sa health bulletin it Malay Inter-Agency Task Force Against COVID-19.
