KALIBO, Aklan—Sambilog patay, tatlong iba pa ro naninahan matapos ro nag-eontad nga pag-eab-anay bandang alas-9:40 it gabi-e sa Sitio Tabiling, Barangay. Mataphao, New Washington, Aklan.
Ginkilaea ro namatay nga si John Carlo Relano, 37-anyos, matapos nga nakaangkon it fatal nga lastro sa tangkugo samtang nina mat-a sa ueo ro naangkon it anang bayaw nga si Jorico Zolina, 24-anyos, parehong tumandok it Brgy. Poblacion, Libacao apang presenteng naga-istar sa nasambitang lugar.
Samtang, ro mag-amang suspek hay ginkilaea kanday Ronie Morales, 60-anyos ag Ronel Morales, 38-anyos, parehong residente it nasambitang lugar.
Suno kay Police Corporal Eduardo Almerante Jr., imbestigador it New Washington Police Station, nakabaton sigon sanda it tawag maghalin sa andang standby post sa Brgy. Candelaria angot sa nagtuhaw nga pag-eab-anay sa nasambitang lugar.
Insigida sigon nga nag-adto sa lugar ro mga katapo it New Washington PNP ag gilayon nandang gindaea sa nasambitang ospital si Relano apang gindeklarang dead on arrival it nagtatap nga doctor.
Base sa inisyal nga imbestigasyon it pulisya, ginsukob sigon it mag-amang Morales ro baeay it biktima bangud nasangagan ro mga raya sa sound system nga nagatukar kasunod it ginahiwat nga okasyon.
Sa pagsalakay it mag-ama, may daea ro mga raya nga sangka espading ag ginapatihan nga raya ro andang ginamit sa pag-eabo sa magbayaw kung siin nagresulta sa hinali nga kamatayon ni Relano.
Nasayuran nga nakaangkon man it tama it pag-eabo ro mag-amang Morales kung siin gindaea ro mga raya sa sangka pribadong ospital sa banwa it Kalibo.
Sa makarun, nagapadayun pa ro imbestigasyon it otoridad sa nasambitang insidente.
