KALIBO, Aklan—Sambilog patay samtang waeong iba pa ro naninahan sa pagtakilid it sangka truck sa Brgy. Omio, Lemery sa syudad it Iloilo.
Ginkilaea ni PLt. Francis Batallones, OIC chief of police it Lemery municipal police station ro dead on arrival sa Sara district hospital nga si Ryan Venus, 17-anyos it banwa it Banga.
Samtang, ninahan man ro ama kara nga si Aries Venus, 39-anyos; mga kaibahan nga sanday Jason Fuentes, 23-anyos; Reynold Imperial, 30-anyos; Jessie Ituralde, 37-anyos; Niel Ivan Motus, 12-anyos, parehong residente it nasambit nga lugar kamana man sanday James Dicusa, 20-anyos; Junever Delfin, 31-anyos ag Christopher Relente, 22-anyos, parehong mga residente it banwa it New Washington.
Samtang, ginkilaea mat-a ro driver it nasambit nga behikulo nga si Larry Alfaro, 50-anyos it Brgy. Jugas sa nasambit nga banwa.
Ginpahayag dugang ni Batallones nga ro nasambit nga truck hay may karga nga mga materyales para sa garden landscape halin sa banwa it Banga nga igadeliver kunta sa banwa it Sara, Iloilo.
Ro lugar nga gin-eontaran it aksidente hay zigzag road kon siin nadueaan sigon it preno ro saeakyan rason nga nawad-an man it kontrol ro driver ag ana eon lang raya nga gintumba agud nga masalbar ro andang kabuhi ag uwa eon it madaeahig nga iba pa bangud nag padoehugon ro nasambit nga karsada.
Ro pila sa mga ninahan hay matapos nga gin-eapatan it paunang medikasyon naka-uli eon ro mga raya sa tagsa nanda ka panimaeay bangud sa minor injuries eamang ro andang naangkon.
Samtang, ro driver hay una sa kustudiya it Lemery PNP station para sa nagakaigong disposisyon.
