IBAJAY, Aklan—Sambilog patay, daywa ninahan sa waeong ka indibidwal nga sakay it tricycle nga naaksidente sa national highway nga sakop it Brgy. Agbago sa banwa it Ibajay.
Sa impormasyon nga nabuoe it Bombo Radyo news team maghalin sa Ibajay Municipal Disaster Risk Reduction Management Council, dead on arrival sa Ibajay District Hospital ro sangka babaye, sa legal nga edad matapos nga makaangkon it fatal nga lastro sa ueo daea it nag-eontad nga aksidente.
Base sa pila ka mga bystander sa lugar, bumaliskad ro tricycle nga may sakay nga waeong ka pasahero kaibahan ro driver nga nagabyahe eon kunta pauli sa probinsya it Antique maghalin sa Poblacion, Ibajay nga nagtambong sa kapyestahan ni Sr. Sto. Niño de Ibajay.
Ro onga ag tiya it biktima hay nagapabilin pang una sa shock nga kondisyon matapos ro aksidente kon sa siin nakaangkon man ro mga raya it lastro sa tudlo ag siki ag presenteng naka-confine sa nasambit nga hospital.
Sa inisyal nga imbestigasyon, posibleng naeosot sa lubak ro kariton it tricycle nga gintunaan it aksidente nga ginkamatay it nasambit nga ginang.
Ro aksidente hay padayon pang ginaimbestigahan it mga awtoridad it Ibajay Municipal Police Station.
