KALIBO, Aklan — Patay ro sangka backrider samtang naninahan man ro driver kara matapos bumunggo ro gina sakyan nandang motorsiklo sa sangka 10 wheeler truck sa barangay Calimbajan, Makato, Aklan.
Gin kilaea ro namatay nga si Micheal Lubrique, residente it Barangay Bakyang, Madalag, Aklan samtang, gin kilaea ro naninahan nga si Eusebio Dalmacio, 50, driver it motorsiklo.
Naga paagto sigon sa Sebaste Antique ro daywa kat makasubeang kara ro 10 wheeler truck nga ginamaneho ni Ebonie Upod 32, tubong Ivisan, Capiz.
Suno sa imbestigasyon it Makato Municipal Police Station owa nakita it driver it truck ro naga paabot nga motorsiklo sa kurbadang bahin samtang gina biyahe ro kahabaon it national road sa barangay Calimbajan, Makato, Aklan.
Inagaw sigon it driver it truck ro linya it kasubeang karang motorsiklo ag bangud sa mabaskog nga impact, inapok kara ro gina sakyang motorsiklo it biktimang si Lubrique.
Nakaangkon it grabeng lastro sa ueo ag sa magkaeain-eain nga parte it anang eawas ro biktima nga nagresulta sa anang insigidang kamatayun.
Sa kostudiya sa makaron it Makato Municipal Police Station ro driver it truck nga si Upod samtang, naga padayun pa ro imbestigasyon it mga otoridad sa nasambitang aksidente.
