KALIBO, Aklan—Sambilog sa kada tatlong unga sa Pilipinas nga naga-edad 5 anyos panaba hay stunted ukon putot.
Suno kay Estella Gia Solidum, sangka nutritionist ag dietritian it Provincial Health Office ukon PHO-Aklan nga ro pagiging stunting ukon pagkabansot ro pinakamabahoe nga problema makarun it nasyon pag-abot sa nutrisyon.
Makarun nga buean it Hulyo hay ginaselebrar ro Nutrition Month, nga may temang “Batang Pinoy, SANA TALL… Iwas Stunting, SAMA ALL! Iwas ALL din sa COVID-19!”.
Sentro it selebrasyon nga mapaeawig pa ro nasayuran it kada pamilya ag it komunidad angot sa ‘stunting’ agud malikawan ro pagkabansot ukon pagiging putot it mga inunga.
Dugang pa kara nga ro probinsya it Aklan hay nakalista man it maabong kaso it mga unga nga “putot”.
Makabig nga stunted ro sangka unga kung pag-abot kara sa edad nga limang dag-on hay owa naabot ro standard height nga 110cm kung sa eaeaki ag 109cm sa babaye.
Pag-eksplekar pa kara nga kung ro sangka unga hay owa nakaabot sa nasambitan nga standard height indi eun kara mabawi pa ro kakueangan sa anang pagtubo ag ro utok hay nagiging stunted man.
Agud malikawan ro pagiging stunting ukon pagkaputot, dapat sigon nga regular nga daehon it mga ginikanan ro andang unga sa maeapit nga health center.
Para sa mga unga nga below 2 years old, kinahangean nga daehon raya sa mga health centers kada buean agud makilo ag masukat ro anang height.
Kung masobra 2 years old eun pwede rayang daehon sa health centers kada ikatlong buean para sa andang ‘growth monitoring’.
Ginapahayag dugang nga dapat pasusuhon ukon i-breastfeed ro mga unga sa sueod it unang an-om nga buean ukon ginatawag nga ‘exclusive breastfeeding’ agud mataw-an it insakto nga nutrisyon ag antibodies si baby ag makalikaw sa nagkaeain eain nga klase it sakit.
