KALIBO, Aklan—Nagapabilin pa sa Intensive Care Unit (ICU) it Aklan Provincial Hospital matapos nga operahan ro sambilog sa limang naninahan sa natabo nga rambol nga nagresulta sa hinali nga kamatayon it sangka persona sa sueod it sangka compound sa Bougainvillea Road, Brgy. Andagao, Kalibo.
Suno kay Mrs. Gleen Rebenito, ina it ginbaril nga si Lindy Rebenito nga samtang naga-inuman sanday Jiven Rebenito, 33-anyos; Reynan Rebenito, 32-anyos; Jenny Moreno, 56-anyos ag Ranny Boy Moreno, 29-anyos parehong residente it nasambit nga lugar hay gulpi eamang nag-abot sa andang compound si Jovany Narral, 42-anyos nga armado it baril ag hinangiban kamana man nga nagpang-ayat it inaway.
Insigida sigon nga gin-atake kara si Lindy ag ginbaril it maeapitan sa tiyan gamit ro kalibre .38 nga baril.
Bangud kara, nakaangkon it rambol hasta sa naagaw kay Narral ro hinangiban kung siin raya ro gingamit sa pagbuno kana sa nagkaeain-eain nga parte it eawas.
Gilayon pa nga gindaea ro mga biktima sa ospital apang gindeklarang patay si Narral.
Mabahoe ro pagpati it pamilya nga dating alitan ro naging motibo sa krimen.
Nasayuran nga antes natabo ro insidente hay nag-atubang pa sa barangay sanday Jovany and Lindy apang owa nagkasugot.
Nag-umpisa sigon sa gumankon it ginang ro isyu matapos raya nga gin-adtunan nanday Narral kaibahan sanday certain Ugoy ag Enting kamana man nga ginpang-eapog ro andang baeay.
Bukon sigon it raya ro unang beses nga nag-gubat sa andang compound si Narral.
Sa pihak nga parte, nagapadayun pa ro imbestigasyon it Kalibo Municipal Police Station para masayuran ro matuod nga natabo sa kinagamo it magtimbang nga parte.
Suno kay Police Major Jason Belciña, hepe it Kalibo Municipal Police Station nga una eon sa andang kostudiya ro ap-at sa limang suspek.
Pagapasakaan sigon ro mga raya it kasong homicide makaron nga adlaw.
Samtang, igapaidaeom man sigon sanda sa paraffin test agud nga matumod kung sin-o ro nagpaeupok it baril.
