KALIBO, Aklan — Nagpanindugan ro naarestong si Jomar Palacios alyas Joker, 24-anyos, ag residente it Brgy. Bulwang, Numancia nga owa imaw it kahilabtanan sa krimen ag nadaeahig eamang sa pagkamatay it 39-anyos nga tricycle driver nga si Wilfredo Tamayo, Jr. nga nasapwan nga duguan ko Nobyembre 27, 2021 sa Brgy. Camanci Norte, Numancia.
Sa interview it Bombo Radyo, ginturo ni Palacios nga ro andang kaibahan at nagapabilin nga at-large nga si Rogie Franco eamang ro nagpangalima sa krimen.
Suno kana nga ro naging partisipasyon eamang nana hay ro pagpuko sa alima it biktima matapos nga hana nga may ginbo-oe sa anang bag .
Bandang alas-7 sigon it gabi-i ko Nobyembre 27 hay ginparahan nanda nga tatlo kaibahan ro nagsurender ag naabswelto sa kaso nga si JR Montallana ro tricycle nga ginamaneho ni Tamayo sa Crossing Bulwang ag nagpahatud sa Brgy. Camanci, Norte.
Gulpi suno kana nga nagdeklara it hold-up si Franco ag sa owa it anuman nga rason hay gulping ginbuno ro biktima it makapilang beses .
Apang nakadaeagan pa sigon ro driver bitbit ro anang mga gamit hasta nga natumba sa kilid it karsada .
Gindugang pa ni Palacios nga owa naka-droga si Franco apang grabe ro kahilungon .
Madumduman nga matapos ro krimen hay gin-abandona it mga suspek ro tricycle sa Sitio Pigado sa Bakhaw Sur Kalibo maeapit sa dump site.
Owa sigon it naging motibo ro anang kaibahan ag posibleng na-tripan eamang ro tricycle driver.
Samtang, matapos nga magpaeagiw kun sa siin nagsaylo-saylo sanda it lugar sa Negros ag Iloilo, uman imaw nga nag-uli sa Aklan ag nagtrabaho bilang construction worker .
Sa kamatuoran suno kana hay nakatrabaho pa imaw bilang piyon sa gina-construct nga police station it Numancia PNP .
Owa suno kana imaw it ideya kon siin eon nagatinir makaron si Franco matapos sanda nga magbueag.
Angot kara, nagpangayo imaw it pasaylo sa pamilya it biktima ag haum nga atubangon ro kasong murder nga ginpasaka kontra kana.
Si Palacios hay naaresto ko Huwebes nga adlaw sa waiting shed sa Brgy. Tabangka, Numancia pinaagi sa gahum it warrant of arrest sa kasong murder.
