NEWS Analysis– Hasta nga owa it nakakasuhan ag napakulong nga agri smugglers ro presenteng administrasyon, ro promisa angot sa food sufficiency, pagpa-umwad sa kaugalingon nga ani ag mayad nga puturo it mga mangugnguma hay owa nakaangkon it katumanan.
Maskin pa nga hasta nga matapos ro termino ni President Ferdinand Marcos Jr. ro anang pagdumaea sa Department of Agriculture, owa man it matabu.
Puro promisa eang ag owa it matabu nga pag-umwad.
Ro mga agri smugglers ag mga nagaprotekta kanda ro mabusog sa kaabu it mapuslan.
Maaywan ro mga makaeoeo-oy nga mangunguma nga nasagasaan it eapnaag nga smuggling.
Mas pang magiging makaeoeo-oy ro pumueuyu nga indi eon masamitan ro ginahambae nga baratong bugas.
Ginpromisa ni Marcos ro P20 pesos per kilo nga bugas.
Owa pa raya natuman.
Kapin sa P30 hasta P40 pesos ro baratong bugas sa baealigyaan ag may posibilidad nga magtaas pa sa maabot nga buean.
Ginpamunuan ni Marcos Jr. ro DA ko Hunyo 1, 2022 para sigon nga magiyahan it husto ro departamento nga mabuhay nga napabay-an it mga nagtaliwan nga administrasyon.
Nagpromisa nga makaangkon it bastanteng pagkaon ag bulig sa mga mangunguma.
Makaangkon it farm-to-market road para madaling maibiyahe ro ani.
Modernong teknolohiya ro igapakilaea agud nga makaangkon it bugana nga ani.
Pinaagi sigon sa mga raya, indi eon maga import it bugas ro Pilipinas.
Makataliwan ro sang dag-on, padayun gihapon sa pag import it agri products ro nasyon .
Bukon eamang it bugas kundi pati ro asukar, sibuyas, galunggong, karneng baboy ag iba pa.
Ko nagtaliwan nga domingo, ginmanduan ni Marcos ro NBI ag DOJ nga tugison ro smugglers it sibuyas ag iba pang agri products.
Ham-an nga makaron eang.
Kinahangean nga may masampolan eon sa smugglers.
Dapat may mapasueod eon sa presuhan!
