NATIONAL News — Agaw-atensyon ro sangka waiting shed sa Barangay Poblacion sa Mapandan, Pangasinan bangud sa naka-install nga airconditiong unit.
Eubus ro kalipay it mga residente sa lugar eabi eon ro mga senior citizens bangud nga indi eon sanda mainitan samtang nagabantay it masakyan.
Mabahoe man ro andang pagpasaeamat sa andang lokal nga gobyerno sa naisipan nga proyekto.
Mag-eowas sa mga katigueangan, prayoridad nga gumamit it de-aircon nga waiting shed hay ro mga nabdos ag persons with disabilities (PWDs).
Hasta sa 20 nga katawo eang ro kapasidad it nasambit nga waiting shed.
Ginasugid nga nag-abot sa P500,000 ro gingastos sa pagpa-obra it waiting shed nga ginbo-oe halin sa 20 percent development fund it lokal nga gobyerno.
Sa ikaywang parte it proyekto, planong butangan raya it solar panels nga nagabalor it P200,000 hasta P300,000 para makatipid sa konsumo it enerhiya.
Ginabantayan ro lugar it kapulisan rason nga masiguro ro kaeowasan it mga pumueuyu.
Bukas ro waiting shed umpisa alas 6 it agahon hasta alas 10 it gabi-i ag igasarado sa gabi-i agud nga indi pag-obrahon nga tambayan it iba.
Mag-eowas kara, plano pa it lokal nga gobyerno nga magpatindog it sambilog pang waiting shed nga de-aircon sa ibang barangay makaron nga dag-on.
