Paga-imponeran it sanction it FIFA ro Indonesian federation kasunod it trahedya nga natabo sa sangka football match sa tunga it Arema ag Persebaya Surabaya nga ginpatigayon sa Malang Regency, East Java, Indonesia.
Raya hay kasunod it pagkamatay it kapin sa 129 katawo ag pagkanina it 300 ka mga indibidwal kon siin ro 180 sa mga raya hay presenteng idto sa ospital bangud sa malala nga injuries.
Suno kay Bombo International Correspondent Ginavella Limpi-Cumla it Jakarta, Indonesia nga nagpaguwa it pahayag si Indonesian President Joko Widoddo nga magapatigayon it madaeoman nga imbestigasyon sa natabo nga stampede.
Masobra sa 3,000 katawo ro una sa sueod it football field nga ginakabig nga over crowded kon siin ro mga fans it magtimbang nga koponan hay nagkainitanan matapos nga napyerde ro Arema sa score nga 3-2.
Ginpahayag dugang ni Cumla nga nagpaandam sigon ro presidente nga raya eon ro ulihi nga trahedya nga matabo sa mga football field ag magapanabat ro mga responsible sa insidente nga ginkamatay it maabong fans.
Mag-eowas kara, may mga police cars nga ginsunog ag makit-an ro sangkiri eamang nga numero it mga otoridad nga nagresponde kumpara sa mga nagpatigayon it kinagamo.
Sa makaron suno kana hay temporaryo nga ginpapundo ro mga football match sa nasambit nga nasyon para taw-an it daean ro imbestigasyon.
