KALIBO, Aklan—Sa paghinakop eon it mga otoridad ro sanduko nga gingamit it suspek nga si Art Tumbukon, 24-anyos, tumandok it Brgy. Agbago, Ibajay sa pagpang-eabo patay sa kaparehong inmate nga si Rommel Tambong, alyas Asyong, 49-anyos it Brgy. Sandimas, Malinao ko gabi-i it Dominggo sa sueod it Aklan Rehabilitation Center.
Suno kay Police Major Belshazzar Villanoche, hepe it Kalibo Police Station, nagaguwa sa andang imbestigasyon nga naakig ro suspek sa biktima matapos kara nga isugid ro paggamit it cellphone it suspek nga hugut nga ginapagbawae sa sueod it presuhan.
Posible suno kana nga ro sanduko nga gingamit it suspek sa paghimo it krimen hay gibuoe sa storage room it pasilidad.
Ginapahayag nga nakaangkon it tatlong igo it pag-eabo sa ueo ro biktima matapos rayang eab-on it suspek samtang nagakatueog nga naging rason it anang kamatayon.
Nasayuran nga nakulong ro suspek bangud sa kasong murder matapos nga makapatay sa banwa it Ibajay.
Sa makaron hay padayun pa ro imbestigasyon it pulisya angot sa insidente.
