Haeos sang adlaw antes ro eleksyon sa Amerika, ginpahayag ni Bombo International Correspondent Rhodora Elizondo Tonel it Texas, USA nga masyadong unpredictable ukon indi mahulaan ro presidential race.
Suno kana nga bangud sa masyadong maeapit ro distansiya it mga numero sa botohan, eabi eon sa pitong ginakabig nga swing states, eubus raya nga nagapabudlay agud nga ma-predict ro resulta.
Masyado suno kana nga hugut ro engkwentruhanay sa tunga ni democrat candidate vice president Kamala Harris ag dating president Donald Trump it republican rason nga limitado ro ikasarang nga mahulaan eagi ro magiging resulta it eleksyon.
Mabudlay sigon nga makabo-oe it mga datos halin sa mga botante sa mga “battleground states” nga posibleng magadikta it resulta it eleksyon eabi eon sa mga owa nagboto ko nagtaliwan nga mga eleksyon.
Dugang pa nga masyadong close fight ro hinampang sa pitong “swing states” rason nga indi pa matumod kon sin-o ro magadaog.
Sa pihak nga parte, ro pagiging radikal ni Trump, mga kasong kriminal nga anang ginapangatubang ag ro anang edad hay posibleng maka-apekto sa anang suporta halin sa moderate voters samtang ro problema sa inflation ag krisis sa affordability sa tiempo it administrasyon ni Joe Biden ro magiging sabeag kay Harris.
Sa prediction makaron it 538 presidential election forecast, ginataw-an si Trump it 52 porsyentong tsansa nga magadaog.
Dugang pa ni Tonel nga sa andang lugar sa Mc Allen Texas, suportado nanda si Trump.
Haeos 60% sigon it populasyon sa andang lugar hay nakaboto eon pinaagi sa early voting.
