Tagilid sa gihapon ro Barangay ag Sangguniang Kabataan Elections.
Nakaeusot eon sa Kamara ro proposed bill nga indi eon pagpadayunon ro eleksyon makaron nga dag-on sa baylo hay sa Disyembre 2023 eon lang.
Ro unang maisip hay kanugon ro pondo nga nagastos eon para sa preparasyon.
Bilang sabat, ginpahayag it Commission on Elections (Comelec) nga indi mauyang ro gingastos sa pagpahaum engkaso nga eubusan raya nga ipaiway.
Pwede pa sigon nga magamit sa masunod nga dag-on ro mga raya.
Maskin nga nauna eon nga ginpahayag it pamunuan it Comelec nga magakinahangean ro andang komisyon it dugang nga P5 bilyon pesos kun igapaiway ro eleksyon.
Mag-eowas sa gastos, sambilog sa makasueubo nga kadungan it pagpaiway sa eleksyon hay ro pagpabilin it mga pasaway nga kapitan.
Nasayuran man naton nga bukon it tanan nga una sa pwesto hay matino.
May mga iresponsable, abusado ag owa gid man it ikasarang ag tagiusuon nga pagserbisyo sa publiko.
Sanda kunta ro mga dapat nga mabayluhan.
Sa pihak kara, bangud nga nagapameligro nga indi eon man madayun ro eleksyon, extended eon man ro pagtiis.
Owa man kita it mahimo kon naging laye eon, bawi eon lang next year ag kabay nga madayun eon.
