KALIBO, Aklan—May nagkaeain-eain nga resolusyon ro gindihon sa Sangguniang Bayan it Kalibo angot sa COVID-19 response.
Suno kay Pook punong barangay Ronald Marte ag ex-officio member it SB-Kalibo nga sambilog kara ro resolusyon nga naga-hinyu kay Mayor Emerson Lachica sa pagtaeana it sang milyong piso nga financial assistance ro kada barangay para sa igapatindog nga Ligtas COVID Center ukon LCC para sa mga naga-uli nga locally stranded individuals ukon LSIs.
Nabudlayan sigon makaron ro LGU-Kalibo bangud nga sa kawad-an it LCC it mga barangay.
Sa makaron ro patakaran sigon, antes nga mag abot ro mga LSIs hay gina-check anay it mga miyembro it barangay health emergency response team ukon BHERTS ro andang baeay ag kon indi makapasar sa standard nga gintaeana it Department of Health hay igabutang sanda sa nasambit nga center imbes nga ipaidaeum sa strict home quarantine.
Gindugang pa ni Marte nga engkaso nga matapos eon ro krisis sa COVID-19 , ro nga ginpatindog nga mga ligtas covid center hay pwede man nga magamit nga evacuation center ukon mga opisina it PWD, senior citizens ag iba pang organisasyon.
Gina-require man sigon makaron nga ro 20% it development fund hay ibutang sa covid related projects it kada barangay ag mga LGUs.
Madumduman nga nauna man nga naghinyu it bulig si Brgy. Capt. Rafael Briones it Briones Kalibo sa LGU-Kalibo it gasoline assistance para sa monitoring it andang mga LSIs ag Returning Overseas Filipino workers ukon ROF.
