KALIBO, Aklan—Nagkasugot ro mga miyembro it Sangguniang Bayan it Kalibo nga indi anay maghimo it anuman nga amendments sa ordinansa angot sa pag-utang sa Development Bank of the Philippines ukon DBP.
Ginaeauman nga ro lokal nga gobyerno it Kalibo hay magabaton it masobra sa P691-milyon pesos agud nga gastusan ro andang mga programa ag iba pang infrastructure projects.
Suno kay SB member Augusto Tolentino nga bukon eamang ro plano nga pagbakae it eugta sa barangay andagao kalibo nga paga-obrahon nga relocation site it mga vendors it Kalibo Public Market ro maapektuhan kundi ro iba pa nga proyekto nga gintaeana-an it nasambit nga pondo kapareho it construction it Covid-19 facilities sa 16 nga barangay, drop-in facility para sa kababayin-an ag pamatan-on, municipal quarantine facility, multi-purpose building ag motorpool ag iba pa.
Gin-insister kara nga kon namahaean ro anang mga kaibahan nga konsehal sa presyo it eugta sa barangay andagao hay maga-usoy sanda it ibang lugar nga mas barato agud nga indi mauyang ro andang mga proyekto.
Ginlaygay sigon it banko nga antes nga maghimo it pag amyenda hay kon ma-release eon ro andang loan.
Nasyauran nga mayoriya it mga SB members hay gina kwestiyon ro pagbakae it lote kun sa siin sa sangka special session, ginbotohan nanda nga amyendahan ro masobra sa P60 million pesos nga budget para sa pagbakae it eugta sa baylo hay itaeana raya sa pagtukod it bag-ong ospital.
Ro presyo it eugta hay ginbaligya it tag-ana nga si Melquiades Robles sa balor nga P10,500 pesos per square meter.
Apang nagpasugot ro tag-ana nga panabaan raya sa P9,500 pesos matapos nga ayu-an it LGU-Kalibo.
Apang bukon pa it kaibahan kara ro pagbayad sa buwis ag iba pang mga kinahangeanon nga dokumento.
Samtang, ginkumpirma dugang ni SB Tolentino nga ginatun-an makaron it konseho ro offer nga eugta sa barangay Estancia, Kalibo nga nagabalor it 5,000 pesos per square meter nga ginapanag-iyahan it mga Garcia nga dati man nga plano nga patindugan it tindahan sa idaeum it administrasyon ni dating Kalibo mayor Raymar Rebaldo.
