Aprubado it Sangguniang Panlalawigan ro resolution of support sa position paper it lokal nga gobyerno it Malay nga nagaduso nga duea-on sa ginaproponer nga House Bill 7032 ukon ro pagtukod it West Aklan Special Economic Zone Authority ukon WASEZA ro barangay Caticlan ag isla it Boracay.
Suno kay Aklan 1st district board member Apolinar Cleope nga ro nasambit nga mga lugar hay indi eon kinahangean nga ipaidaeum sa special economic zone bangud nga sigidas man ro development kara.
Mag-eowas kara ro isla hay sakop eon it tourism economic zone ag makabig raya nga forest land ukon protected area.
Ginpahayag dugang nga engkaso nga igapilit, raya hay posibleng magaresulta sa pag-abu pa it mga imprastraktura ag pumueuyu nga ginapatihan nga makasamad sa environment particular sa isla it boracay , kun sa siin instriktong ginapasunod ro maximum carrying capacity.
Ginakabaeak-an man nga ro WASEZA hay maka-eabag sa polisiya it national governemt angot sa local autonomy.
Ro position paper hay nauna eon nga ginsumite it LGU-Malay sa chairman it committee on economic affairs it manabang kapueuongan it kongreso ag gintaw-an it kopya kara ro provincial government ag ro SP.
Ro proposed bill ni House Committee on Economic Affairs Vice Chairperson ag Aklan 2nd District Rep. Teodorico Haresco Jr. angot sa pagtukod it WASEZA hay naka-pending makaron sa kongreso.
Ko Lunes hay nagpasa it resolution ro SP agud nga suportahan ro panindugan it LGU-Malay sa nasambit nga isyu kun sa siin nakataeana raya nga igapadaea sa kongreso eabi eon sa committee on economic affairs
