Nagdihon it sangka resolusyon ro Sangguniang Panlalawigan it Aklan nga hugut nga nagasuporta agud nga eubusan nga maging laye ro senate bill 2165 ukon automatic inome classification of local government units ukon LGUs sa bilog nga nasyon.
Suno kay Aklan 1st District Board Member Apolinar Cleope , sambilog sa mga sponsor it nasambit nga resolusyon nga ro nasambit nga tikang hay mabahoe nga bulig engkaso nga pamatian it kongreso ag insigida nga maging laye.
Gindugang pa ni Cleope nga ro income classification it Aklan hay nagapabilin sa second class nga probinsiya sa pihak nga ginakabig raya nga billionaire province bangud sa mabahoe nga income partikular ro revenue nga nagahalin sa isla it Boracay nga nagapangunang tourist destination sa bilog nga kalibutan.
Tuyo sigon kara nga ma-reclassify ro aklan bilang 1st class province.
Ro klasipikasyon it Aklan hay nakabase pa suno kana sa executive order 249 nga ginpaguwa ni dating Pangueong Corazon Aquino.
Engkaso nga maging laye, may gahum ro probinsiya nga mabag-o ro andang klasipikasyon depende sa gina-ganar nga income.
Sa oras nga maging 1st class municipality ro Aklan, maabu nga mga benepisyo ro sarang nga mabaton kara kamana man it mga empleyado it provincial government .
Dugang pa nga magataas man ro buwis nga makolekta.
Nasayuran nga kaibahan ni SP Cleope nga nagdihon it resolusyon si Board Member Jay Tejada .
