Nagpasa it resolution ro sangguniang panlalawigan it Aklan partikular ro committee on energy sa pagpanguna ni Aklan second district board member Jupiter Aelred Gallenero para paimbestigahan sa kongreso ro natabo nga makapilang beses nga brown-out ko nagtaliwan nga inadlaw nga eubusang nakaapekto sa mga konsumidor ag sa negsoyo sa isla it Boracay.
Ro nasambit nga resolution hay naka-endorso kay Aklan second district congressman Teodorico Haresco agud nga daehon ag matalakay ro isyu nga bukon eamang it sa probinsya it Aklan nakaeksperyensya it sunod-sunod nga pagkaduea it electric power supply kundi maging ro bilog nga isla it Panay.
Ro nasambit nga resolution hay gin-aprubahan sa nasambit nga plenaryo.
Samtang sa pihak nga parte, gusto man ni Aklan first district board member Nemesio Neron nga magpatawag it legislative inquiry angot sa status it Timbaban Hydro Powerplant.
Suno kana, nagpromisa sigon ro Oriental Energy Company nga maga-operate eon agud nga makadugang sa supply it elektrisidad apang hasta sa makaron nga unang quarter it dag-on hay uwa gihapon raya nagahueag.
Bangud kara, gusto sigon it mga konsumidor masayuran ro estado it nasambit nga hydro power plant nga makit-an sa banwa it Madalag.
