KALIBO, Aklan—Sa tuyo nga masiguro ro bastanteng supply at mapabakod ro presyo it mga karneng baboy sa probinsiya it Aklan, nagpasa it sangka resolusyon ro Sangguniang Panlalawigan nga nagahinyu kay Governor Florencio Miraflores nga magpaguwa it Executive Order nga naga-regulate sa pagbiyahe it mga baboy paguwa it probinsiya.
Suno kay board member Emmanuel Soviet Russia Dela Cruz nga raya hay pinaagi sa anang Committee on Agriculture and Aquatic Resources ag Committee on Trade, Industry and Commerce.
Suno kana nga padayun ro pagtinaas makaron it presyo it karne it baboy partikular sa metro manila bangud sa krisis nga daea it COVID-19 pandemic ag African Swine Fever ukon ASF nga padayun ro pagpanaeasa sa iba pang parte it nasyon.
Ginkasugtanan man sa committee hearing nga ipabilin ro dating Executive Order ni Governor Miraflores nga nagabawae sa pagsueod it mga pork products sa probinsiya agud nga padayun nga maprotektahan ro industriya it pagbababoy sa aklan halin sa makahaealit nga ASF.
Base suno kana sa report it Office of the Provincial Veterinarian ukon OPVET, ro regular volume it baboy para sa local consumption sa Aklan hay ginatantiya nga naga abot sa 14,000 heads kada buean.
Bangud kara, ginsuhestiyon sigon nanda nga magtaeana it monthly limit sa mga igapaguwa nga baboy agud nga malikawan ro kakueangan it supply.
Ginpasiguro man sa committee hearing nga ro 50 porsiyento it monthly quota it baboy nga ginapasugtan nga igabiyahe paguwa it probinsiya hay iga-reserba para sa mga negosyante it aklan ag ro nabilin nga 50% hay tunga-on sa mga non-Aklanon nga traders, mag-eowas eon lang kon pagakanselahon ro andang quota ukon owa it sin-o man nga Aklanon trader ro interesadong mag apply.
Angot kara, ginrekomenda man sa OPVET nga ro tanann nga mga buhi nga baboy nga ginabiyahe para sa commercial shipment hay kinahangean nga ipa-rehistro sa andang taeatapan.
Ro mga ginapasugtan eamang nga mga negosyante hay dapat nga taga-Region 6 ukon purong Aklanon ag kinahangean nga magbo-oe it Hog Transport Pass ukon sticker ag QR code halin sa provincial government.
