Nakataeana nga magpatawag it legislative inquiry ro opisyales it Sangguniang Panlalawigan it Aklan.
Raya hay agud nga masayuran ro pinal nga report ag assessment it Department of Environment and Natural Resources (DENR) Mines and Geosciences Bureau (MGB) angot sa isyu it sinkholes sa isla it Boracay.
Suno kay Aklan second district board member Jay Tejada nga base sa anang panan-awan hay nagakadapat kunta nga bago pa man ginsapubliko it DENR-MGB ro andang report hay ginpaagi anay nanda raya sa lokal nga gobyerno it Malay ukon maging sa provincial government.
Uwa sigon sanda nagakwestyon sa trabaho it nasambit nga ahensya apang dapat kunta hay ginpasayod it una ro mga natungdan nga gobyerno antes pa man nga ginsapubliko.
Apang, ginpasiguro it LGU Malay nga uwa it dapat nga kabaeak-an sa mga nadiskubrehan nga sinkholes sa nasambit nga isla.
Madumduman nga ginatos ka mga sinkholes ro nadiskubrehan it nasambit nga ahensya sa isla it Boracay kon sa siin ro iba sa mga raya hay may mga red markings nga ro boot hambaeon hay inde pwede patindugan it istraktura.
