KALIBO, Aklan—Nagbaeay it resolution si Board member Errol Santillan it probinsya it Antique angot sa pagkondenar sa brutal nga kamatayon ni Bonna Hercia Ambay, 23-anyos, it Brgy. Nauring, Pandan, Antique ag nagatrabaho bilang manager-reliever sa RD Pawnshop Mabini St. Kalibo branch.
Suno kay Santillan, ro nasambit nga resolution hay bilang simpatya sa pamilya Ambay ag pagkondenar it bilog nga probinsya it Antique sa hinali nga kamatayon it daeaga kon siin sa andang paghimay-himay hay nagakadapat eamang nga pasakaan it kasong murder ro suspek ag gwardya nga si Mark Archie Torrefiel, 31-anyos it Brgy. Cajilo, Makato.
Apang ro ginapangatubang nga kaso makaron ni Torrefiel hay Robbery with Homicide apisar nga nakaangkon it 18 nga igo it pagbuno ro biktima.
Ginpahayag dugang ni Santillan nga ro bilog nga probinsya hay nagakasubo ag nagasimpatya sa pamilya Ambay.
Presente pa makaron nga nakakulong sa Kalibo Municipal Police Station si Torrefiel ag ginahueat eon lang ro commitment order maghalin sa korte agud nga iga-remit eon raya sa Bureau of Jail Management and Penology ukon BJMP sa Brgy. Nalook, Kalibo.
