KALIBO, Aklan—Uman magahinyu ro sangguniang panlalawigan agud nga makapatigayon it committee hearings angot sa natabo nga tension sa tunga it Aeta Community ag ro nagtake over it mga armadong gwardya base man sa mando it land developer sa ginasugid nga kanseladong Certificate of Land Ownership Award ukon CLOA nga napasaalima it mga Aeta sa tyempo ni dating Pangueong Rodrigo Duterte.
Tuyo sigon it legislative inquiry nga matumod ro legalidad sa pagbawi it eugta nga gintau kanda it gobyerno.
Nagpanindugan si board member Jay Tejada, chairman it committee on Indigenous People kon owa it ginabuytan nga kopya ro mga katutubong Ati nga kanselado eon ro andang CLOA hay owa it kinamatarung ro land developer nga mapahalin sanda bangud nga may kahigayunan pa sanda nga maka apela sa office of the president.
Madumduman nga napas-eawan ro committee on laws, rules and ordinances ag committee on indigenous peoples, person with disabilities and senior citizens nga matumod kon may nagakaigo nga basehan ro pagbawi sa eugta it 44 nga Ati sa isla it Boracay ko nagtaliwan nga hearing.
Uwa it naipakitang kopya ro Department of Agrarian Reform (DAR) Region VI sa konseho it ginapahayag nga cancellation it CLOA kon sa siin uwa man sanda it nabuoe nga kongkreto ag klarong sabat maghalin kay DAR Regional Director Atty. Sheila B. Enciso.
Nasayuran nga eubus ro pagkabaeaka makaron it mga ati sa Boracay bangud nga nagapameligro nga mabawi ro andang komunidad nga gintinguhaan nanda nga mahawanan ag makapangabuhi it eksakto.
