KALIBO, Aklan—Patay eon kat nasapwan ro sangka binatilyo matapos nga naeomos ko adlaw it dominggo sa baybayon nga sakop it Brgy. Dumatad, Tangalan.
Suno kay P/Master Sgt. Peryl Antaran it Tangalan Municipal Police Station, bandang alas-2:00 it aga-aga kat nakit-an ro eawas it biktimang si Rey Morales, 14-anyos it Barangay Pagsanghan, Banga nga naputos eon it baeas ro anang eawas ag uwa eon it kabuhi.
Sa imbestigasyon it pulisya, bandang alas-12:00 it truadlaw ko adlaw it dominggo kat hana eon kunta nga mag-ilabas ro magpamilya nga nag-eskursyon sa nasambit nga baybayon kat uwa nagdungan kanda ro onga bangud sigidas pa raya nga nagapinaligos.
Apang, makataliwan ro pilang minuto hay uwa eon imaw kita-a rason nga insigidang nagpangayo it bulig ro pamilya sa Philippine Coast Guard ag sa iba pang natungdan nga awtoridad para magpatigayon it search and rescue operation.
Makataliwan ro pilang oras hay napas-eawan ro mga awtoridad nga makit-an ro biktima.
Ko ulihi hay retrieval operation eon lang ro gindeklara it Philippine Coast Guard hasta nga kaina it aga-aga kat daeayon raya nga masapwan sa 200 meters ro kaeayuon halin sa natabuan it insidente ag maeapit sa community center kamana man sa PCG sub-station.
Posible sigon nga uwa nakabutwa ro biktima kat hampakon it mabaskog nga humbak ag natabuan pa nga taob rason nga madaeom ro tubi maskin sa binit it dagat.
