KALIBO, AKLAN – – – Kulong ro sangka 18-anyos nga eaeaki matapos nga gindakma ro dughan it sangka chinese national sa Kalibo International Airport.
Gin kakibot it biktimang si Chao Wang ro gulpi nga pagsoepot sa anang prente it suspek nga si John Rick Perarez ag residente it Brgy. Pook, Kalibo kun sa siin insigidang gindakma ro anang dughan.
Base sa imbestigasyon it Civil Aviation Police, ro biktima hay bag-o eamang nga panaog sa tourist bus nga ginsakyan maghalin sa Brgy. Caticlan, Malay matapos nga nagbakasyon sa isla it Boracay ag nagahueat nga mapanaog ro iba pa kara nga kagamitan kat matabo ro insidente
Gin kakibot raya it turista rason nga nagpangayo it bulig ag nagreklamo sa taeapatan it Civil Aviation Authority.
Samtang, gilayon nga gin-eagas ro suspek kaibahan ro mga barkada kara apang madasig nga nakapaeagyo rason nga gin-alerto ro tanan nga hubon it pulisya kon sa siin natigayon nga na-intercept raya sa banwa it Kalibo.
Nasayuran nga sa idaeum raya it makahi-eilong nga ilimnon kat gin himo ro pagpanbastos.
Samtang, uwa eon nagpasaka it reklamo ro bangud sa nagbyahe eonraya pauli it China.
Ro insidente hay gin pa-record sa Kalibo PNP Station ag nakakulong eon sa makaron ro nasambitang suspek.
