KALIBO, Aklan–Nagapabilin nga blangko ag paealigban sa pamilya it 19 anyos nga eaeaki ro rason sa likod it anang hinali nga pag-utas sa anang kaugalingon nga kabuhi sa Brgy. Jumarap, Banga.
Suno sa ginang nga nag-istorya pa sanda ko ana nga onga kon sa siin magabalik eon imaw sa Laguna kaibahan ro anang pangaywang asawa bangud nga idto ta sanda gaistar.
Apang, kinibot sanda bandang alas-4:00 it aga-aga kat ginapukaw eon kunta ro biktima agud nga mag jogging kaibahan ro anang mga barkada hay nasapwan eon lang raya nga uwa eon it kabuhi.
Una kara, may mga pabilin-bilin eon ro biktima sa anang social media post apang uwa eagi raya nataeopangdan ko ana nga ina bangud nga uwa man imaw it madaeom nga rason nga matumod kon ham-an it naobra raya sa anang onga.
Naging emosyonal man ro ginang bangud sa masakit para kana nga ina nga makaraya ro rason it hinali nga kamatayon it anang onga nga plano pa kunta nana nga paeskwelahon sa pagbukas it school year.
Samtang kung may problema ka ag gusto mo it kaistorya, puwedi kang magtawag sa: National Center for Mental Health Crisis Hotline (NCMH-USAP) sa 0917-899-USAP (8727) ukon sa 7-989-USAP (8727).// Puwedi man nga magtawag sa Hopeline PH 24/7 hotlines: 0917-558-4673 (Globe), 0918-873-4673 (Smart), 2919 (toll-free for Globe and TM).
