KALIBO, Aklan—Patay eon kat nasapwan ro sangka daeaga sa Brgy. Caticlan, Malay matapos nagdesisyon raya nga utason ro anang kaugalingong kabuhi bandang alas-6:00 it gabie.
Base sa report maghalin sa Malay PNP, ro anang mismo nga tiyo ro nakakita kana sa sueod it CR kon sa siin nakit-an man ro anang suicide note.
Ginasugid nga problema sa pamilya ro naging rason it 20-anyos nga daeaga butang nga nahimo kara nga utason ro anang hueam nga kinabuhi.
Ro biktima hay graduating sa kolehiyo sa sangka pribadong eskwelahan sa banwa it Kalibo.
Pambato man imaw it anang department sa mga beauty pageant bangud sa ginaangkon kara nga kagwapa.
Nauna eon nga ginpaathag sa Bombo Radyo Kalibo ni Dr. Jeanette Ortega, sangka Psychiatrist ag Mental Health Advocate nga makabulig it mabahoe sa mga nagaexperiensiya it depresyon ro pakikipag-istorya sa ibang tawo, pag-angkon it recreational activities, healthy ag positive lifestyle, ag eabaw sa tanan ro support group halin sa mga masaligan nga amigo ag atensyon it pamilya.
Indi sigon makabulig sa pagsolbar it problema ro aeak ukon illegal nga droga.
Makabulig man suno kana sa paglikaw sa depression ro pag-exercise bangud nga ginapaguwa kara ro mga endorphins ukon ro “joy hormones”.
Samtang para sa mga tawo nga nakaexperiensiya it depresyon, pwedeng magtawag sa Hopeline it DOH sa numero (02) 804-4673 ag 0917-5584673 para sa counselling ag iba pang impormasyon.
