KALIBO, Aklan—Bilog eun ro desisyon it sangka 21 anyos nga babayi nga makipagbueag sa anang live-in partner sa sueod it ap-at nga dag-on bangud indi eun sigon kara matiis ro pagpanakit kana.
Suno kay Mary Ann Tacas it Barangay Cayangwan, Makato nga owa eun it tiyansa pa nga makipagbalikan imaw sa anang live in partner nga si Nilo Dela Cruz, residente it Barangay Andagao, Kalibo.
Gina-alegar nga ko nagtaliwan nga adlaw eamang hay gin-eook imaw ni Nilo matapos nga owa magpasugot nga makipagsiping ag ginapabangdan nga may karelasyon nga iba.
Samtang naging problema man sigon nanda ro perming pagpakialam it pamilya it eaeaki sa andang mga desisyon bilang mag-partner.
Medyo ginaboe-an pa sigon imaw it papel bilang ginikanan matapos nga namatay ro andang sang dag-on ag an-um nga buean nga unga.
Sa pihak nga parte, ginpamatud-an man ni Jenifer Malicse, hipag it babayi ag residente it Barangay Old Buswang Kalibo nga ginasakit ni Nilo si Mary Ann.
Dugang pa kara nga sa makarun hay may iba eun nga karelasyon si Mary Ann ag plano kara nga magpadueong sa Metro Manila nga hugot man nga ginpamalibaran ni Jenifer.
Sa pihak nga parte, eubos man ro pagpakit-eooy ni Ronilo Dela Cruz sa anang live in partner nga si Mary Ann para eamang nga manumbalik raya sa andang panimaeay.
Haom man sigon imaw nga bag-uhon ro anang ugali engkasong balikan imaw it anang karelasyon.
Samtang, aminado man imaw nga anang ginasakit ro anang line in partner bangud masami nga imaw ro ginabasoe kara sa pagkamatay it andang unga.
