KALIBO, Aklan—Kapin sa daywang buean nga ginmonitor it pulisya ro 22 anyos nga drug suspek antes nga nadakpan sa ginpatigayon nga drug buy-bust operation it Philippine Drug Enforcement Unit (PDEU) ag Philippine Drug Enforcement Agency (PDEA) sa Brgy. Andagao, Kalibo.
Suno kay PLt.Col. Frenzy Andrade it PDEU Aklan, todo pamalibad ro suspek nga si Justine Valdez y Torrefiel it Sitio Hagakhak, Brgy. Baybay, Makato apang normal eamang sigon raya sa mga nadadakpan nga nagaduso it illegal nga droga.
Una sigon nga transaksyon kay Valdez hay marijuana apang naubusan sigon imaw it stock rason nga ginsumbil ro suspected shabu nga natigayon nga nabueo kana it pulisya kabaylo it P2,000 nga marked money.
Samtang, ginpamalibaran ni Andrade ro alegasyon nga ginsakit nanda ro suspek kasunod it anang pagresist sa igapatigayon kunta nga body search it mga otoridad.
Suno pa kay Andrade, pilang oras sandang naka standby sa lugar bangud nga mabuhay nagsipot ro suspek hasta nga nagab-ihan ro mga raya sa andang operasyon.
