KALIBO, Aklan—Arestado ro sangka 23-anyos nga eaeaki matapos nga illegal nga nagapataya ukon ginatawag nga “bokis” bandang alas-5:20 it hapon sa Brgy. Joyao-joyao, Numancia.
Una kara, nakabaton it report ro Numancia PNP nga may nagapataya sa nasambit nga lugar kon siin sa pagberipika it mga otoridad hay nadakpan it mga raya si Dominggo Tapado ag residente it Brgy. Calimbajan, Makato.
Narekober sa anang posisyon ag kontrol ro mga papel nga nagaserbing resibo, ballpen ag kapin sa P520 nga kantidad it kwarta nga ginapatihan nga koleksyon maghalin sa mga manugtaya.
Si Tapado hay gilayon nga gindaea sa taeatapan it pulisya kon siin imaw sa makaron temporaryong nakakustudiya ag posibleng magapangatubang sa kasong pag-eabag sa Republic Act 9287 ukon Illegal Number Games.
