KALIBO, Aklan–Owa eon it kabuhi kat masapwan ro sangka 24-anyos nga soltero matapos nga magbigti-patay sa sueod it anang kwarto sa Brgy. Dumga, Makato.
Ro biktima hay tumandok it banwa it Libacao apang presenteng naga-istar sa baeay it anang tiya sa nasambit nga lugar.
Ginpahayag ni PSSgt. James Padasas, imbestigador it Makato Municipal Police Station nga nakabaton sanda it tawag halin sa sangka concerned citizen kaina it agahon nga nagapangayo it police assistance ag gilayon nanda nga ginrespondehan.
Sa pag-usisa it mga otoridad, nakit-an sigon it anang kaibahan sa baeay ro biktima nga nakahigot sa butong it anang kwarto gamit ro kaeat ag owa eon it kabuhi.
Ginapahayag nga umpisa Abril 2 hay masami eon nga nagakulong sa sueod it kwarto ro biktima.
Paealigban pa sa pamilya ro rason it anang pagpakamatay bangud owa raya nagasugid it anang problema kamana man nga owa it suicide note nga nakita.
Sa pihak kara, kumbinsido sigon ro pamilya nga owa it foul play nga natabo sa pagkamatay it soltero kung siin nagpamalibad man sanda nga ipaidaeom sa autopsy ro bangkay.
Samtang, kung may problema ka ag gusto mo it kaistorya, puwedi kang tumawag sa National Center for Mental Health Crisis Hotline (NCMH-USAP) sa 0917-899-USAP (8727) ukon sa 7-989-USAP (8727).
Puwedi man nga magtawag sa Hopeline PH 24/7 hotlines: 0917-558-4673 (Globe), 0918-873-4673 (Smart), 2919 (toll-free for Globe and TM).
