KALIBO, Aklan—Magangatubang sa kasong pag-eabag sa Republic Act 9165 ukon Comprehensive Dangerous Drugs Act of 2002 ro sangka 27-anyos nga eaeaki kasunod sa ginkasa nga drug buy-bust operation it gintingob nga pwersa it Aklan Provincial Drug Enforcement Unit ag Ibajay Municipal Police Station, sabado it gabie sa Brgy. San Isidro sa banwa it Ibajay.
Ro suspek nga uwa eon ginpangaeanan hay residente it Brgy. Unat sa nasambit nga banwa kon sa siin nabuoe sa anang posisyon ag kontrol ro sangka sachet it suspected shabu kabaylo it kapin sa P1,000 pesos nga buy-bust money.
Sa ginpatigayon nga body search kana it pulisya, narekober dugang it mga operatiba ro kapin sa an-om pang ka sachet it ginadudahan nga illegal nga droga.
Ginapahayag nga ro suspek hay dati eon man nga nakulong sa kaparehong kaso apang temporaryong nakahilway ko dag-on 2016 matapos nga naka-avail it plea bargaining.
Ro nasambit nga suspek hay una makaron sa paghinakop it natungdan nga pulisya para sa nagakaigong disposisyon.
