KALIBO, Aklan—Nauli sa trahedya ro pagpangisda it sangka 28 anyos nga eaeaki matapos nga maeumos raya sa anang pag-eunip ag owa eon nakabutwa kaina it agahon sa Sitio Rizal, Brgy. Poblacion, New Washington.
Gindeklarang dead on arrival sa Aklan provincial hospital ro biktimang si Reden Racia, residente man it nasambit nga lugar.
Base sa report, nag-eunip ro biktima it isda, apang nagtaliwan eon ro haeos 20 minutos hay owa gihapon raya nakabutwa rason nga gin usoy imaw it iba pang mga mangingisda sa lugar.
Owa eon raya it alintro sa paghaw-as kana sa tubi ag insigidang gintaw-an it first aid pinaagi sa pagpaidaeum sa CPR it naka-agi sa lugar nga miyembro it PDRRMO-Aklan.
Sa pag-responde man it mga katapo it MDRRMO New Washington, padayun raya nga gintaw-an it atensyong medical ag pagkatapos hay gin transport sa ospital apang owa eon naka abot it buhi.
Ginapatihan nga una sa impluwensiya it aeak ro biktima kat matabu ro insidente.
