Magapangatubang sa kasong pag-eabag sa Republic Act 9165 ukon Comprehensive Dangerous Drugs Act of 2002 ro sangka 31-anyos nga drug pusher matapos nga maaresto sa ginpatigayong drug buy bust operation it Provincial Drug Enforcement Unit (PDEU) , Philippine Drug Enforcement Agency (PDEA) ag Ibajay PNP bandang alas-6 it pang orason kabie sa Brgy. Agbago, Ibajay.
Sa pagpanguna ni PDEU Chief PMajor Frensy Andrade, narekober sa posisyon ag kontrol it suspek nga ginkilaea kay Jervin De Juan it Bagto, Lezo ro sangka triangular nga sachet, 1 pang medium sized sachet it suspected shabu kabaylo it buybust money nga 2,500 pesos.
Ginabuebanta nga kapin sa P13,000 nga balor it droga ro narekober sa suspek nga may kabug-aton nga gaabot sa 2grams.
Nauna eon nga ginamonitor it mga otoridad it kapin sa sang dag-on ro suspek antes nga daeayon nga arestuhon.
Sa makaron, una sa temporaryong pagkostudiya it Ibajay-PNP si De Juan ag nakataeana nga igapaidaeom sa drug test makaron nga adlaw sa siyudad it Iloilo.