KALIBO, Aklan—Patay eon kat maka-abot sa provincial hospital ro sangka 31 anyos nga eaeaki matapos nga makaangkon it head on collision sa sangka tricycle bandang alas-10:55 kabi-i sa national highway nga sakop it Brgy. Tambak, New Washington, Aklan.
Ginkilaea ni P/Corporal George Regalado Jr., imbestigador it New Washington PNP ro biktima nga si Jonel Nillasca, sangka pump boy ag residente it Brgy. Tabayon, Banga, Aklan.
Base sa report, nagapa-uli eon kunta ro biktima halin sa anang trabaho sa sangka gasoline station sa banwa it New Washington, apang pag-abot sa nasambit nga lugar hay nag-overtake raya sa ginasundan nga kotse.
Tiempo man nga nagapaabot ro tricycle nga halin sa banwa it Kalibo nga direksyon nga ginamaneho ni Prince Reyes, 43-anyos it Brgy. Poblacion sa nasambit nga banwa rason nga natabu ro banggaaan.
Sa impact it banggaan, inapuk ro suksok nga helmet it biktima rason nga nag-angkon it grabeng lastro sa ueo.
Nadaea para raya sa ospital, apang gindeklarang dead on arrival.
Samtang ro driver it tricycle hay padayun nga ginabueong sa Provincial Hospital matapos nga mag-angkon man it mga lastro sa anang eawas.
Natukiban pa sa imbestigasyon nga owa it lisensiya ag iba pang nagakaigo nga dokumento ro biktima.
Ginkumpirma man it anang mga katrabaho nga antes nga nag-uli hay nag-inuman anay sanda.
