KALIBO, Aklan—Arestado sa ginpatigayon nga drug buy bust operation nga ginpangunahan it Philippine Drug Enforcement Agency (PDEA) ro sangka eaeaki nga dati eun nga nakulong ag naka-avail it plea bargaining sa Brgy. New Buswang, Kalibo.
Ginkilaea ni P/Maj. Frensy Andrade ro suspek kay John Andrade Almero alyas “Tamtam”, 32-anyos ag tumandok it Pastrana Street, Kalibo.
Narekober sa nasambitang operasyon ro daywang ka sachet it suspected shabu kabaylo it P2,000 nga buy bust money.
Samtang, ginapahayag ni P/Maj. Andrade nga mabuhay eun nandang gina-monitor ro nasambitan nga suspek.
Mag-euwas nga raya hay dati eun nga drug surrenderee, may mga background man sa illegal nga droga ro pamilya kara.
Nasayuran nga nauna eun nga ginkanta it sambilog pang suspek nga nadakpan man sa droga nga si Almero ro andang ginaboe-an it supply.
Samtang sa pihak nga parte, ginpahayag it suspek nga si Almero nga ginpilit eamang it sangka pulis nga idutdot sa anang buesa ro kwarta.
Sa kamatuoran sigon kara hay nagatrabaho eamang imaw it maayos sa nasambitan nga establisyemento ag daeayon eun nga gin-aywanan ro illegal nga droga.
Samtang, ginhangkat man it suspek ro mga katapo it kapulisan nga magpakita it video ukon resulta it fingerprint test nga nagapamatood nga imaw ro nagapanag-iya it ginapatihan nga shabu.
Nauna kara, may nagsueod anay nga sangka eaeaki sa anang gin-ubrahan ag nagbakae it soft drinks apang owa raya it sensilyo rason nga anang gintawag ro anang amo sa sueod.
Kasunod kara, nag-order sigon ro eaeaki it beef pares ag ana man nga gin-eahaan.Maangan-angan pa hay nagsueod sigon ro maabo eun nga mga sibilyan ag gulpi eamang imaw nga ginpahapa.
Gintinguhaan pa kara nga magpangayo it bulig sa anang amo apang antes pa karun hay natigayon eun imaw nga mapusasan it mga otoridad ag pilit nga ginpagguwa.
