KALIBO, Aklan—Nagapadayun pa ro imbestigasyon it Nabas Police Station sa pagkamatay it sangka 34-anyos nga babaye matapos nga magtambang sa rambol nga nag-eontad sa guwa it sangka baylehan sa Brgy. Toledo, Nabas kaina it aga-aga.
Suno kay P/Staff Sgt. Melvin Alba it nasambit nga police station nga padayun ro andang pagtipon it mga testigo nga makaturo kon sin-o ro nakabuno sa biktimang si Melissa Bernabe Magsael, residente man it nasambit nga lugar.
Apang ro kutsilyo nga gingamit sa krimen nga nagahaba it 11 pulgada kaibahan rong tagob ag pueo hay narekober eon nanda nga natukiban nga ginapanag-iyahan man it anang manghud nga si Joey Bernabe Magsael, 29-anyos.
Ginapatihan nga bangud nga nakita it biktima nga ginapulihan ro anang manghud hay nagpatunga raya sa kinagamo hasta nga ko ulihi hay imaw ro nabun-an sa anang dughan.
Eakot man sa insidente sanday John Carlo Cunanan Canillo, 28-anyos, Edilberto Rubio Mationg, 37-anyos, manghod kara nga si Amorlito Rubio Mationg, 30-anyos.
Ro mga raya hay gindaea sa Ibajay District Hospital, apang si Melissa hay gindeklara nga dead on arrival.
Samtang, ginklaru ni P/Staff Sgt. Alba nga bukon it nabdos ro biktima kapareho it mga naunang napabalita.
