KALIBO, Aklan—Arestado ro sangka motorista matapos nga mag-eabag sa ginapatuman nga curfew ag nadakpan pa it armas bandang alas-10:00 kabie sa Sitio Centro, Brgy. Sipac, Malinao.
Ginkilaea raya kay Raymund Agustino, 34-anyos ag residente it Brgy. Bulabod sa nasambit nga banwa.
Base sa report, halin sa Brgy. Sipac ro driver ag pauli eon kunta sa andang residensya kat nasub-eang nana ro nagapatrolya nga pulisya rason nga insigida imaw nga ginparahan ag ginsita.
Nagpundo si Agustino ag dikara eon nataeopangdan it mga otoridad ro belt bag kon sa siin nagaguwa ro pueo it kalibre 45 nga baril.
Gin-usuyan it dokumento ro armas apang uwa imaw it ginapakita ag una pa raya sa idaeom it impluwensya it aeak rason nga insigida imaw nga ginbitbit sa Malinao Police Station kon sa siin imaw temporaryo nga ginkustudiya para sa nagakaigong disposisyon.
