Kalibo Aklan ——Patay ro sangka 37 anyos nga eaeaki matapos nga magbigti kahapon sa Brgy. Afga, Tangalan.
Ro biktima hay ginkilaea kay Lowel Urquiola , ag residente it nasambitan nga lugar.
Base sa report, gin-usoy sigon it anang barkada nga si Susan Arroyo ro biktima kahapon matapos magkabaeaka bangud nga owa eun nanda raya nakit-an.
Apang sa anang pag-check sa panimaeay it biktima hay parehong nakasarado ro gate it entrance ag backdoor kara .
Rason man agud imaw hay magpangayo it bulig sa anang umagad ag kato natigayon nga mapwersa it bukas ro pertahan kung sa siin nakit-an eun lang it mga raya ro patay nga eawas it biktima nga nakabitay sa sueod it anang kwarto.
Ginasugid nga una eun nga nagareklamo ro biktima nga may nababatyagan rayang masakit sa anang tiyan kung sa siin raya man ro ginapanan-aw nga rason it otoridad sa pagpakamatay .
Mabahoe man ro posibilidad nga owa it natabong foul play sa insidente.
Nasayuran nga naga-isaeahanon eamang ro biktima sa andang panimaeay bangud nga owa pa nakauli maghalin sa Metro Manila ro anang igmanghod.
