KALIBO, Aklan—Duguan nga gindaea sa Aklan Provincial Hospital ro sangka eaeaki matapos nga gin-eabo it kaugalingon nga manghod sa Brgy. Nalook, Kalibo, Aklan.
Nakaangkon it lastro sa nagkaeain-eain nga parte it eawas ro biktimang si Rolinie Sancio, 38-anyos matapos nga gin-eabo it makapilang beses it ginatumod nga suspek nga ana man mismong manghod nga si Renie Sancio, 34-anyos ag parehong residente it nasambitang lugar.
Base sa inisyal nga imbestigasyon it Kalibo PNP, pareho nga una sa idaeom it impluwensya it aeak ro daywa kon sa siin may nagpatunga sigon nga mainitang diskusyon sa magtimbang nga parte hasta nga umabot sa punto nga nagbueo it sanduko ro manghod nga nagahaba it 23 inches ag gilayon nga gin-eabo sa anang magueang.
Si Rolinie hay insigidang gindaea it anang pamilya sa nasambitang hospital kon sa siin imaw sa makaron padayon nga naka-confine para sa nagakaigong medikasyon.
Samtang, ro suspek nga si Renie hay presenteng una sa kustudiya it pulisya para sa nagakaigong disposisyon.
