Ginapatihan it Makato Municipal Police Station nga disgrasya ro gintunaan it hinali nga kamatayon it sangka 3rd year college sa kursong civil engineering nga nauna eon nga nakit-an nga nagakueob, naghabok ro eawas ag uwa eon it kabuhi sa sangka kanae sa circumferential road nga sakop it Brgy. Calangcang, Makato.
Ginkilaea ni PCMSgt. Josefino Baldomero it Makato PNP Station ro biktima nga si Joshua Franz Gaviola, sa legal nga edad ag residente it Brgy. Ambolong, Batan.
Ginpaathag nana nga posibleng naaeang-aeangan ro motorista sa karsada bangud nga bukon nana raya it kabisado nga gintunaan sa anang pagkaaksidente ag dumiretso sa kanae nga may tubi.
Nakatakod pa ro helmet driver ag una man mismo sa anang gin-eotawan nakit-an ro anang motorsiklo.
Ro nasambit nga lugar hay medyo pakurbada nga karsada nga nadisgrasyahan man it sangka padre de pamilya, kapin sa daywang buean eon ro nakataliwan.
