Sangka 40-anyos nga eaeaki sa Libacao, naeomos-patay

KALIBO, Aklan—Patay eon kat nasapwan ro sangka eaeaki sa suba nga sakop it Brgy. Can-awan, Libacao bandang alas-7:00 kabie.

Ginkilaea it Libacao PNP ro biktimang si Federico Sapico, 40-anyos ag residente it nasambit nga lugar.

Base sa inisyal nga imbestigasyon it pulisya, nagpangahoy sigon ro biktima pilang metros eamang ro kaeayuon halin sa andang baeay apang ro lugar hay medyo banglid ag sa idaeom kara hay ro suba.

Ginapatihan it pamilya nga inatake it sakit nga epilepsy si Sapico rason nga nahueog raya sa suba ag natigayon nga naeomos.

Kumbinsido man sigon ro anang pamilya nga uwa it foul play sa nasambit nga insidente rason nga ginpakamayad it pamilya nga inde eon lang pag-ipaidaeom sa otopsiya ro anang bangkay.