KALIBO, Aklan—Padayon nga ginabueong sa Aklan provincial hospital ro sangka padre de pamilya matapos nga gin-eabo it anang kaeapit baeay bandang alas-11:00 it gabie sa Brgy. San Isidro, Banga.
Ginkilaea ro biktimang si Efren Vicencio, 42-anyos samtang ro suspek hay ginkilaeang si Charlet Carpio, 40 anyos ag parehong residente it nasambit nga lugar.
Base sa report, nakipag-inuman ro biktima kaibahan ro anang mga onga hasta nga nagvideoke ro mga raya.
Kaangot kara, nasangagan sigon si Carpio nga una man sa idaeom ko impluwensya it aeak rason nga gin-adtunan kara ro nagakantahan ag ginsita rason nga may nagpatunga nga mainitang diskusyon sa magtimbang nga parte.
Ginasugid nga may daeang ‘espading’ ro suspek kat raya hay sumalakay sa baeay samtang may ginbo-oe man nga wasay ro biktima agud nga paeagon kunta ro suspek.
Apang nagdere-deretso ro suspek ag gin-eabo sa ueo si Vicencio nga gintunaan it anang pag-angkon it lastro.
Insigida man nga gindaea it anang pamilya ro biktima sa ospital kon sa siin imaw sa makaron nakaconfine para sa anang nagakaigong pagbueong.
Samtang, padayon pang ginatugis it pulisya ro suspek matapos nga nakapaeagyo kasunod it nasambit nga insidente.
