KALIBO, Aklan—Nasapwan eon lang nga owa it kabuhi ro sangka 45-anyos nga babaye samtang nagahamyangon sa kagamuhan nga sakop it Purok 4, Brgy. Unidos, Nabas.
Nakilaea ro biktima nga si Maila Palomata ag residente it nasambit nga lugar.
Base sa inisyal nga imbestigasyon it Nabas PNP, may deperensya sa paminsaron ukon may gina-angkon nga mental disorder ro biktima ag nakaugalian eon kara nga magpanaw kada gabi-i.
Ginasugid nga nakita eon lang it sangka mangunguma nga si Rex De Jose, 43-anyos it Brgy. Rizal, Nabas ro biktima nga nagahamyangon sa kagamuhan kun sa siin nakapanaog pa ro suksok kara pang idaeom.
Gilayon man kara nga gin-impormahan ro pamilya angot sa hitabo bangud maeapit man ro lugar sa mismong baeay it biktima.
Owa man ginabuoe it pulisya ro posibilidad nga ginhimuslan ro biktima antes namatay.
Sa pihak kara, owa man it nakita nga gas-gas ukon anuman nga lastro sa eawas it biktima.
Ginpaidaeom eon man ro bangkay sa post-mortem examination kahapon kamana man nga nakataeana rayang ipaidaeom sa autopsy makaron nga adlaw matapos magsugot ro pamilya agud nga matumod ro rason it pagkamatay it biktima.
