KALIBO, Aklan—Nagapangatubang sa kasong murder ro 47 anyos nga si Deolito Pineda nga tumandok it Passi City, Iloilo angot sa pagpatay sa anang naka-away sa Brgy. Dingle, Banga, Aklan ko nagtaliwan nga Sabado it gabi-i, Disyembre 16.
Gin-akusahan si Pineda it kasong pagpatay kay Ricky Rivero, 52 anyos, residente it nasambit nga lugar.
Madumduman nga nakaangkon it mainitan nga diskusyon ro suspek ag biktima sa guwa it sangka baraka nga nagresulta sa pagbuno ni Pineda kay Rivero nga tinamaan sa anang tiyan ag leog nga naging rason it anang hinali nga kamatayon.
Sa ginkasa nga manhunt operation bandang ala-1:30, aga-aga it Domingo, Disyembre 17, boluntaryo nga nagsurender ro suspek matapos nga naabutan sa anang baeay.
Narekober it mga awtoridad ro siyaw nga gingamit sa krimen nga may haba nga 16 pulgada.
Samtang, nagpanindugan ro suspek nga gindepensahan eamang nana ro anang kaugalingon matapos nga ginpaeag imaw nga eab-on it biktima gamit ro anang daea nga sanduko.
Suno kana nga may dati sanda nga alitan matapos nga makapilang beses eon imaw nga ginbayo it biktima nga owa eamang nana ginpatos.
Nagapabilin nga sa kustodiya it banga municipal police station ro suspek.
