KALIBO, Aklan—Nagapadayon ro imbestigasyon it Balete Municipal Police Station sa makangieidlis nga pagtadtad it eabu sa sangka 50-anyos nga eaeaki it anang kaugalingon nga gumankon ag dating naka-alitan sa Sitio Maeubog, Brgy. Calizo, Balete, Sabado it gabi-i.
Ginkilaea ro namatay nga biktima nga si Rex Quindong, sangka ex-convict ag residente it nasambit nga lugar.
Naninahan mat-a ro sambilog sa mga suspek nga si Edsel Quindong, 22 anyos, gumankon it biktima samtang sa ginkustodiya it kapulisan ro sambilog pa nga si Martin Dalida, parehong residente it nasambit nga barangay.
Suno kay P/Major Bryan Alamo, OIC chief of police it Balete PNP nga nagakatueog eon ro biktima kat atakehon it mga suspek sa anang baeay, kun sa siin nag angkon raya it lastro sa nagkaeain-eain nga parte it eawas nga nag abot pa sa punto nga nautod ro sambilog sa anang alima.
Ginapatihan pa it kapulisan nga maskin nga may nakahulid nga sanduko ro biktima sa anang eugban, apang owa raya nagamit bangud tueog raya kat sudlon it mga suspek.
Nakita pa sa imbestigasyon nga may forcible entry ukon pwersahan nga ginsueod ro baeay it biktima.
Presenteng naka hospital arrest si Edsel matapos nga mag angkon it lastro sa likod it anang siki nga ginapatihan nga aksidenteng naeabu ni Dalida.
Dating alitan ro motibo sa krimen matapos nga nakulong it haeos 20 anyos si Rex sa pagmasaker sa anang limang miyembro it pamilya sa nasambit nga lugar ko 1980s.
Ginasugid nga si Dalida mismo ro nag agto sa Balete PNP agud nga i-report ro natabu nga krimen.
Nakataeanang pasakaan it kaso it mga otoridad ro mga suspek.
