KALIBO, Aklan–Arestado ro sangka 52-anyos nga eaeaki matapos nga magbaligya it baril sa sangka nagpakuno-kuno nga buyer sa Diversion Road it Barangay Tigayon, Kalibo.
Ro suspek hay nakilaea kay Alejandro Arcenio ag residente it Barangay Poblacion sa banwa it Lezo.
Sangka nagpakuno-kuno nga buyer ro nakipagtransaksyon nga ginbaligyaan ni Arcenio it Armscor 12 gauge shotgun sa balor nga masobra sa P17,000.
Ro buy-bust operation hay ginkasa it Aklan Police Provincial Office (APPO).
Suno sa suspek nga ginkasugtanan nanda it anang ka-transaksyon nga tan-awon anay ro baril ag pagabak-eon kon magustuhan.
Apang, nangawa sigon imaw nga gulping ginsueod ro buy-bust money sa anang ginabuytan nga plastic nga ginsudlan it baril.
Ginkasa ro nasambit nga operasyon kontra sa suspek matapos raya nga ginpaidaeum sa surveillance ag natumod nga eakot sa illegal nga hilimuon.
Aminado imaw nga ginbakae nana ro baril sa balor nga 16,000 pesos may daywang buean eon ro nagtaliwan ag planong ibaligya sa balor nga 26,000 pesos.
Posibleng magapangatubang si Arcenio sa kasong pag-eabag sa RA 10591 ukon Comprehensive Firearms and Ammunition Regulation Act.
