Patay ro sangka 58-anyos nga eaeaki matapos nga ginbaril-patay it owa pa makilaeang mga suspek bandang alas-7:45 it pang orason kabie sa may bahin Brgy.Polo sa banwa it Ibajay.
Ginkilaea ro biktima kay Antonio Tejada ag residente it nasambit nga lugar.
Sandig sa inisyal nga imbestigasyon it Ibajay Municipal Police Station , nagabantay sa sueod it anang baraka ro biktima kaibahan ro asawa ag anang onga kat matabo ro insidente.
Maghalin sigon sa direksiyon it Brgy. Polo ag paagto sa banwa it Tangalan ro mga owa pa matumod nga suspek nga nakasuksok it jacket nga may hood kat insigida nga ginbaril ro nakatalikod nga biktima.
Bangud kara, nakaangkon it pilang ka mga tama it pagbaril sa nagkaeain-eain nga parte it anang kaeawasan ro biktima kun siin gilayon man rayang gindaea sa Ibajay District Hospital apang gindeklara nga Dead on arrival.
Matapos ro pagpamaril hay madasig man nga nagpaeagyiw ro owa pa matumod nga mga suspek.
Angot kara, ro biktima hay ginapahayag nga naeakot sa mga pilang ka mga insidente partikular sa sangka shooting incident tatlong dag-on eon ro nakataliwan.
Sa makaron nagapadayon pa ro madaeom nga imbestigasyon it Ibajay-PNP kun raya hay may kaangtanan sa nasambit nga pagpamaril-patay kay Tejada.
