KALIBO, Aklan—Nasapwan eon lang nga nagahamyangon ag uwa eon it kabuhi ro sangka mananggiti matapos nga mahueog sa puno it niyog sa Brgy. Polocate, Banga.
Ginkilaea ro biktima nga si Nicolas Teodosio, 64-anyos ag residente it nasambit nga lugar.
Sa inisyal nga imbestigasyon it Banga PNP, agahon pa ulihi nga nakit-an ro biktima nga buhi kon siin nag-eaong pa raya sa anang pamilya nga mananggot it anang sanggutan.
Antes pa man makit-an ro patay nga eawas ni Teodosio, nakabati it mabaskog nga eagapok ro anang onga bandang alas-11:00 it agahon sa pag-eaum nga natumba ro andang motorsiklo.
Apang, sa pag-usisa hay uwa it anuman nga senyales nga may nahueog ukon natumba rason nga ginbaliwala eon lang nanda raya.
Samtang, eubus man ro andang kabaeaka matapos nga hapon eon ag uwa gihapon nakauli ro andang padre de pamilya.
Dikara eon sigon sanda nag-usoy sa kanyugan ag nasapwan eon lang ro biktima nga uwa eon it kabuhi.
Ginapatihan it pamilya nga nahueog raya sa puno it niyog nga gintunaan it anang hinali nga kamatayon.
