KALIBO, Aklan—Patay ro sangka 64 anyos nga mangunguma matapos barilon it owa pa nakilaeang suspek sa Sitio Maylunok, Barangay Dalagsaan, Libacao, pasado ala-1:00 it hapon it Martes, Disyembre 19, 2023.
Suno kay P/Capt. Roel Bereña, OIC chief of police it Libacao Municipal Police Station nga nagatikang ro biktimang si Bendocio Asiong, residente it nasambit nga lugar paagto sa anang abaca plantation kat ginbaril it suspek samtang nakatalikod nga naging rason it anang insigidang pagkamatay.
Si Asiong hay dating wanted person nga naaresto it kapulisan, apang nakahilway matapos nga makapagpiyansa sa kasong pagbaril-patay sa anang naka-alitan.
Padayun pa nga ginatumod it pulisya ro pagkatawo it suspek ag motibo sa krimen.
Dugang pa ni Capt. Bereña nga nagapatigayon pa sanda it follow-up operation ag backtracking angot sa kaso.
Kadungan kara, nagpanawagan man ro mga awtoridad nga makipag-angot kanda kon sin-o man ro nakasaksi sa krimen agud nga mataw-an it hustisya ro pagkamatay it biktima.
